ការតាំងពិព័រណ៍សិល្បៈអំពីការប្រែប្រួលអាកាសធាតុនៅមជ្ឈមណ្ឌលសិក្សាពេញមួយជីវិតប៉ាលហាល
កាលពីថ្ងៃទី៩ ខែធ្នូ ឆ្នាំ២០២៤ អង្គការទិន្នន័យអំពីការអភិវឌ្ឍ (អូឌីស៊ី) បានរៀបចំការតាំងពិព័រណ៍សិល្បៈអំពីការប្រែប្រួលអាកាសធាតុប្រចាំឆ្នាំនៅមជ្ឈមណ្ឌលសិក្សាពេញមួយជីវិតប៉ាលហាល ខេត្តព្រះវិហារ។ វាគឺជាវេទិកាមួយសម្រាប់លើកកម្ពស់ការយល់ដឹង និងផលប៉ះពាល់អំពីការប្រែប្រួលអាកាសធាតុទៅលើប្រព័ន្ធអេកូឡូស៊ី និងសហគមន៍ ដែលមានអ្នកចូលរួមជាង ២០០នាក់ រួមទាំងអាជ្ញាធរមូលដ្ឋាន គ្រូបង្រៀន និងសិស្សានុសិស្ស។
ការតាំងពិព័រណ៍សិល្បៈនេះទទួលបានការគាំទ្រពីមូលនិធិហេនរេចបូល និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ តាមរយៈអង្គការ FHI360 ក្រោមគម្រោងគាំទ្រអង្គការសង្គមស៊ីវិល៖ ចង្កោមអង្គការសង្គមស៊ីវិល។
ការប្ដេជ្ញាចិត្តរបស់អូឌីស៊ីក្នុងការលើកកម្ពស់ការយល់ដឹងអំពីការប្រែប្រួលអាកាសធាតុ បានចាក់ឫសក្នុងកិច្ចខិតខំប្រឹងប្រែងរបស់ខ្លួនក្នុងការលើកកម្ពស់ការអប់រំ និងការតភ្ជាប់ឌីជីថលនៅក្នុងខេត្តព្រះវិហារ តាមរយៈកម្មវិធីបណ្ណាល័យអ្នកប្រយុទ្ធ។ កម្មវិធីបណ្ណាល័យនេះបានផ្តល់នូវការតភ្ជាប់ Wi-Fi ដោយឥតគិតថ្លៃនៅមជ្ឈមណ្ឌលសិក្សាពេញមួយជីវិតប៉ាលហាល។ អូឌីស៊ីបានពង្រឹងសមត្ថភាពសហគមន៍មូលដ្ឋាន គ្រូបង្រៀន និងសិស្សានុសិស្ស តាមរយៈការសម្របសម្រួលក្នុងការចូលប្រើអ៊ីនធឺណិត ដែលជាតម្រូវការរបស់ពួកគេដើម្បីបន្តការសិក្សា និងការទទួលព័ត៌មានអំពីបញ្ហាសំខាន់ៗដូចជាការប្រែប្រួលអាកាសធាតុជាដើម។
ព្រឹត្តិការណ៍នេះក៏បានរំលេចពីកិច្ចសហការរបស់អូឌីស៊ី ជាមួយអាជ្ញាធរមូលដ្ឋានក្នុងសង្កាត់ប៉ាល់ហាល ដោយលោកចៅសង្កាត់ប៉ាល់ហាលបានសម្តែងការអរគុណដល់ក្រុមការងារអូឌីស៊ី ក្នុងការបង្កើតឱកាសអប់រំនៅក្នុងសហគមន៍។ លោកនៅតែបន្តភាពជាដៃគូជាមួយអូឌីស៊ី ដើម្បីពង្រឹងកម្មវិធីអប់រំសម្រាប់ការចូលរួមសហគមន៍ និងការពង្រឹងសមត្ថភាពយុវជន។
ការតាំងពិព័រណ៍សិល្បៈអំពីការប្រែប្រួលអាកាសធាតុបានចាប់ផ្តើមដំបូងនៅឆ្នាំ២០២៣ គឺជាគំនិតផ្តួចផ្តើមប្រកបដោយភាពច្នៃប្រឌិតមួយដែលមានបំណងជួយអ្នកចូលរួមក្នុងការឆ្លុះបញ្ចាំង និងយល់អំពីការប្រែប្រួលអាកាសធាតុតាមរយៈសិល្បៈ។ ការតាំងពិព័រណ៍ចូលរួមលើកកម្ពស់ការសន្ទនាបើកទូលាយអំពីសកម្មភាពអាកាសធាតុ និងការចូលរួមរបស់សហគមន៍ក្នុងការរៀបចំអនាគតប្រកបដោយនិរន្តរភាព។
ចំណុចលេចធ្លោមួយនៃព្រឹត្តិការណ៍នេះគឺបទបង្ហាញដ៏បំផុសគំនិតរបស់លោក Dixon Siu ដែលជាហប្រធានប្រចាំប្រទេសនៃកម្មវិធីអាជីវកម្មប្រកបដោយការទទួលខុសត្រូវ ក្រោមផ្នែក Global Delivery នៃក្រុមហ៊ុន Fujitsu។ ការបង្ហាញរបស់លោកអំពីការប្រែប្រួលអាកាសធាតុ ផលប៉ះពាល់ និងយុទ្ធសាស្ត្រកាត់បន្ថយ ធ្វើឱ្យអ្នកចូលរួមចាប់អារម្មណ៍ជាខ្លាំង។ ការបង្ហាញរបស់លោក Dixon មិនត្រឹមតែផ្តល់ព័ត៌មានប៉ុណ្ណោះទេ ប៉ុន្តែថែមទាំងជំរុញអ្នកចូលរួមឱ្យរួមចំណែកយ៉ាងសកម្មចំពោះដំណោះស្រាយបម្រែបម្រួលអាកាសធាតុ តាមរយៈការប្រើប្រាស់រូបភាព និងអន្តរទំនាក់ទំនងផងដែរ។
ដើម្បីចូលរួមជាមួយយុវជនបន្ថែមទៀត អូឌីស៊ីបានរៀបចំសកម្មភាពអន្តរកម្មជាច្រើនក្នុងគោលបំណងលើកកម្ពស់ការច្នៃប្រឌិត និងការគ្រប់គ្រងបរិស្ថាន។ សិស្សានុសិស្សលើកទឹកចិត្តឱ្យបង្កើតស្នាដៃសិល្បៈនៅលើកាបូបស្ពាយ ដែលពួកគេអាចយកទៅផ្ទះ និងប្រើប្រាស់ជាការរំលឹកពីការប្តេជ្ញាចិត្តរបស់ពួកគេចំពោះសកម្មភាពអាកាសធាតុ។ លើសពីនេះ សិស្សានុសិស្សមានឱកាសដាំដើមរុក្ខជាតិតូចៗក្នុងផើង ដែលពួកគេអាចយកទៅមើលថែនៅផ្ទះបាន ដែលនេះបង្ហាញពីសារៈសំខាន់នៃការថែរក្សាបរិស្ថាន។ ការលេងហ្គេមឆ្ពោះទៅរកគោលដៅ!ក្តារគោលដៅអភិវឌ្ឍន៍ប្រកបដោយចីរភាព ក៏បានផ្តល់នូវការអប់រំសម្រាប់សិស្សានុសិស្សដើម្បីស្វែងយល់អំពីគោលដៅអភិវឌ្ឍន៍ប្រកបដោយចីរភាព និងការផ្សាភ្ជាប់ទៅនឹងការប្រែប្រួលអាកាសធាតុ។
តាមរយៈសកម្មភាពទាំងនេះ អូឌីស៊ីបានលើកទឹកចិត្តដល់អ្នកចូលរួមឱ្យដើរតួនាទីយ៉ាងសកម្មក្នុងការកាត់បន្ថយការប្រែប្រួលអាកាសធាតុ។ ព្រឹត្តិការណ៍នេះចូលរួមធ្វើឱ្យសិស្សានុសិស្សមានការយល់ដឹងអំពីគោលដៅអភិវឌ្ឍន៍ប្រកបដោយចីរភាព និងសក្តានុពលរបស់ពួកគេក្នុងការធ្វើឱ្យមានភាពខុសប្លែកគ្នាក្នុងការដោះស្រាយការប្រែប្រួលអាកាសធាតុតាមរយៈការជំរុញភាពច្នៃប្រឌិត ការងារជាក្រុម និងការយល់ដឹងអំពីទំនួលខុសត្រូវបរិស្ថាន ។
អូឌីស៊ីនៅតែបន្តការប្តេជ្ញាចិត្តរៀបចំពិព័រណ៍សិល្បៈអំពីការប្រែប្រួលអាកាសធាតុប្រចាំឆ្នាំនៅខេត្តព្រះវិហារ ដែលជាជំហានដ៏សំខាន់មួយក្នុងការលើកកម្ពស់ការយល់ដឹងអំពីការប្រែប្រួលអាកាសធាតុ និងជំរុញទឹកចិត្តយុវជនឱ្យធ្វើសកម្មភាព។ តាមរយៈការពង្រឹងកិច្ចសហការជាមួយអាជ្ញាធរមូលដ្ឋាន សាលារៀន និងមជ្ឈមណ្ឌលសិក្សា អូឌីស៊ីនៅតែបន្តដើរតួនាទីសំខាន់ក្នុងការលើកកម្ពស់វប្បធម៌នៃការអប់រំអំពីអាកាសធាតុ និងការចូលរួមរបស់សហគមន៍ ដោយធានាថាមនុស្សជំនាន់ក្រោយត្រៀមខ្លួនដើម្បីដោះស្រាយបញ្ហាប្រឈមនៃការប្រែប្រួលអាកាសធាតុ។
